Andinya de Globasa
“Mi le xwexi #Globasa, mas ban oto (tem hin basa) haji bealogi, in maner hu da ger morgi moy eskrido texto. Fe folo, nun, mi esto (na xwexi to). Mi xa moni to fe jaxali nyan or, ible, fe duayum jaxali nyan.” (lexi in gwaho bemaxusgi mi, cel na maxgi minguya)
Mi hare dua-comenli ganjon tem hin ijen.
Durki Globasa moywatu le sen max andin kom Pandunia, mi si fikir ki, historili, to no real sen denpul andin kom gitay de tosu komuntim. Am memori ki ren le cudu “sen” fe tayti fe “is” xaki Globasa *le sencu andin fe ofcen maxmo kom 90*! Ji ren haji xidu na lilalogi forma de ban lexi, denwatu hu alo sahayli basa kom Lidepla or Interlingua no ger. Globasa, fe fato, sen relativomo nenandin intre populer sahayli basa.
Nenpreciso xey tem den ijen sen ki, fe fato, ren no haja fale multi day alogi fe nunya. Eger ren xwexi nunyali Globasa, ren ger abil na aham maxorili texto hu da beeskri in xali Globasa. Rensu juhudi cel xwexi resta na sen menapul, banmo.
Ban insan abil na tahamul multi alocu, ji ban insan onxala na no musi na yolyu tem alocu fe moy nyan finki basa bekompletogi. Mi jandan onxala ki ren abil na fale karar fol sesu vole.
Fe 2023 su mesi 7, ban neo alogi le okur tem linkuli falelexi. To, fe hataya, no sengi ki lao jumle sencu gramatili mal. Fe 2023 su mesi 8, neo alogi le okur tem plasilexi. To tema basili lexi, fe folo to sen surprisane ki denpul alogi beingida fe nunli fase. Mas, fe fini, ren abil na yongu plasilexi fe lao maner, eger ren vole. Fe 2023 su mesi 11, max alogi le okur tem relativo baxjumle. Durki to kwasisen rasonapul ji mi siya hin alogi, am nota ki hin alogi nun sen destruine (hu da mena: ban lao jumle uje sencu possahi ji no funsyon).